Nuwe Hervorming Netwerk

NHN — Johannesburg Tak

Bybel verwysing: 1 Kor 15:37-38

Wys vir die kinders verskillende prente van plante en gesels oor hulle goeie en slegte punte, bv:

Rose

Sonneblomme

Kaktusse

Kruie

Wortel

So is rose baie mooi blomme (ten spyte van hulle dorings) wat ek in ’n blompot kan sit, terwyl wortels nie so mooi is dat ek hulle in my huis in ’n blompot wil uitstal nie. Tog is wortels weer goed vir my gesondheid — hulle het baie vitamines wat ek inneem wanneer ek dit eet.

Ons kan nie ’n wortel in ’n roos verander of andersom nie. ’n Wortelsaadjie lei tot ’n wortelplantjie wat wortels produseer en so ook ’n roossaadjie lei tot ’n roosplant wat uiteindelik die mooiste rose dra. Hierdie verskynsel noem ons DETERMINISME. Determinisme beteken dat ’n iets vooraf bepaal is nie en nie kan verander nie. ’n Wortelsaadjie is bestem om wortels te produseer en ’n roossaadjie is bestem om mooi rose te dra. Dit kan nie verander nie. Die samestelling van ’n wortelsaadjie kan nie verander nie. (Lees 1 Kor 15:37-38)

So is daar ook van determinisme sprake in my en jou samestelling. Toe jy in jou ma se maag gevorm het, het sekere selletjies/gene bymekaargekom wat jou gevorm het. Hierdie samestelling van selletjies en gene het bepaal hoe jy sal lyk as jy gebore word, asook hoe jou persoonlikheid aanmekaargeweef is.

Vertel vir my van jouself — hoe lyk jy? Hoe lyk jou persoonlikheid? Wat is jou goeie en jou sterk punte?

Verduidelik dan ook hoe elkeen van ons uniek is, en dat uiterlike en innerlike eienskappe reeds in die baarmoeder bepaal is.

Al is ’n plantjie se samestelling vooraf bepaal, kan ons nog steeds sien hoe ’n saadjie kan groei en verander. Die saadjie ontkiem, stoot bo die grond uit, vorm ’n plantjie en dra blomme (soos in die roos se geval). Al is ons samestelling ook vooraf bepaal, kan ons ook groei en verander — innerlik en uiterlik. Ons kan nooit se ons is so gemaak en so laat staan nie.

VERANDERING/GROEI is moontlik.

Ek kan verander — innerlik en uiterlik.

Ek kan ook verandering bring vir ander mense en ook vir my omgewing.

Ek kan ’n POSITIEWE VERSKIL maak.

Soos Jesus.

Dink oor Jesus. Hoe was Jesus? Watter beeld sien jy as jy aan Jesus dink?

Jesus het vir mense kom leer wat ware liefde beteken. Hy het die mense van sy tyd geleer dat dit verkeerd is om mense uit te stoot omdat hulle anders of minderwaardig is. Hy het kom leer dat dit verkeerd is om mense te "label". As mense in daardie tyd die volgende "labels" gedra het, is hulle uit die samelewing verstoot:

• armes
• blindes
• lammes
• vrouens
• kinders
• melaatses
• mense wat ander gelowe aangehang het (nie-Jode)
• Ander kultuurgroepe (bv. Samaritane)
• prostitute

Hierdie mense mag nie deel van die "in-crowd" wees nie — hulle was die "out-crowd".

Jesus wou hierdie mense terugtrek in die "in-crowd" in. Dit het die "in-crowd" baie kwaad gemaak, soveel so dat hulle die lewe vir Jesus baie moeilik gemaak het. Hulle het hom probeer uitvang met moeilike vrae. Uiteindelik het hulle Jesus self uitgestoot en hom doodgemaak. Ten spyte van al die hartseer en pyn wat Jesus verduur het, het sy boodskap en sy optrede vir baie mense hoop gebring en vir hulle hulle menswaardigheid teruggegee. So het Jesus ’n positiewe verskil kom maak en het hy kom wys dat mense nie aan determinisme uitgelewer is nie.

Partykeer het ’n mens juis die moelike tye in jou lewe nodig, sodat jy ’n positiewe verskil kan maak — vir jouself of vir ander. In die moeilike tye van jou lewe, wanneer jy hartseer is of moet deel met dinge wat jou seermaak, leer jy juis maniere (verandering) aan wat jou help om die lewe beter te hanteer.

Kan julle my vertel van kere in julle lewens wat dit swaar met jou gegaan het, en waar jy belangrikke lesse geleer het. Watter lesse het jy geleer wat jou nou in die lewe help — lesse wat jou verander het?

Kan jy my vertel van kere waar jy verandering vir ander mense kon bring?

AKTIWITEIT EN HERSIENING:

Ons gaan vanoggend plantjies plant in houertjies wat ons kan saamneem huis toe. Wat dink julle wil ek hê julle moet onthou elke keer as julle die plantjie natgooi en kosgee?

Plante het verandering nodig om te kan groei:

Grond, water en kos.

Elke keer as julle verandering bring in die plantjie se omstandighede (water, kos) sodat die plantjie kan groei, moet julle ook onthou dat julle verandering kan bring in julleself of ook vir ander (Positiewe verskil maak). Ons is nie uitgelewer aan determinisme nie.