Nuwe Hervorming Netwerk

Ek het verlede jaar die boek van Clayton Sullivan van oorsee bestel bloot op grond van die titel wat my oog gevang het. In die voorwoord skryf hy die volgende: 'Rescuing Jesus from the Christians has not been written for academics or for the clergy. Instead it has been written for reflective laypersons who are not satisfied with the belief system they encounter in orthodox Christianity. I have written Rescuing Jesus from the Christians out of the conviction we are living in an era that requires a reconceptualization of the Christian faith.'

Clayton is 'n twee-en-sewentigjarige baptiste predikant wat ook aan die University of Southern Mississippi (Hattiesburg) doseer het. Hy skryf met die wysheid van iemand wat vertroud is met die Christelike tradisie, die Suidelike Baptiste goed ken, iemand met 'n liefde vir die akademie en iemand wat weet hoe om kennis oor te dra. Hy het begrip vir gelowiges wat erken dat hulle nie meer tuis is in die ortodokse Christendom nie. Hy is immers self so 'n persoon. Die volgende was vir my 'n veelseggende opmerking, want ek wonder wat tydens die komende Algemene Sinode van die NG Kerk (Oktober 2002) gaan gebeur: 'I was raised within the Southern Baptist denomination. My fate has been to see this largest of Protestant denominations torn asunder by the fundamentalist controversy. Fundamentalists now control the denomination, and Baptists sympathetic to post-Enlightenment scholarship have been expelled. I have witnessed this controversy with great sorrow and dismay.'

Sy boek val in twee hoofdele uiteen: (1) 'The recovery of the historical Jesus' en (2) 'Four strategies for rescuing Jesus'. Die eerste deel handel hoofsaaklik oor die navorsing oor die historiese Jesus en die boodskap wat Hy sou verkondig het.

Clayton skryf in eenvoudige taal oor Jesus se boodskap, sy godsbegrip, die maagdelike geboorte, Jesus se houding teenoor nie-Jode, die gebeure rondom die kruisiging, ens. Hy sluit die eerste deel met die volgende vrae: 'Can Jesus be rescued from the church's dogmatic castle where many Christians believe he should remain enclosed? Is there a solution to the church's schizophrenia of mind versus dogma? Is it possible to be a Christian believer without committing intellectual suicide?' Hierop antwoord hy positief in die tweede hoofdeel waar hy uitstippel hoe ons vandag oor Jesus kan dink en glo. Hy doen vier 'strategieë' aan die hand: (1) tref 'n onderskeid tussen Jesus vóór die opstanding en Jesus ná die opstanding; (2) breek met die ortodokse belydenisse as dit jou nie bevredig nie, niemand het van God die reg ontvang om jou te veroordeel nie; (3) waak teen twee uiterstes: (a) om 'n sentimentele beeld van Jesus te skep, en (b) om Jesus as uiters verhewe te beskou; (4) verheug jou in godsdienstige pluralisme.

Ek beveel die boek van harte aan by almal wat gefassineer is deur die historiese Jesus-navorsing en die idee van 'n nuwe hervorming.

Daar is 'n baie bruikbare verklarende woordelys aan die einde van die boek waar Clayton meer inligting gee oor filosowe en teoloë waarmee gewone lesers miskien onbekend is. Die woordelys bevat ook definisies van enkele belangrike filosofiese en teologiese begrippe.

Op die agterblad van die boek staan die volgende woorde: 'I am not arguing that an inquisitive Christianity that strives for intellectual honesty is in itself superior to orthodox Chrstianity. I am contending, however, that it is an alternative, valid version of the Christian faith.' Hierop reageer ek met: 'Clayton, jou doring! Ek kon dit nie beter gesê het nie.'

Die boek kos byna R 200,00 maar dis 'n goeie belegging.

Sakkie Spangenberg

Sullivan, C 2002. Rescuing Jesus from the Christians . Harrisburg: Trinity Press International. (ISBN 1-56338-380-2)