Nuwe Hervorming Netwerk

Abel Pienaar abelpienaar @ lantic.net 17 September 2006

Tim Freke het kom vra hoekom daar met soveel sekerheid gesê word dat Jesus ’n werklike historiese persoon was? En of dit nie net ’n “geskepte” Joodse weergawe van die reeds bekende “god-mens”- tradisie was nie. Want deur sy navorsing vir sy boek “The Jesus Misteries” het hy teveel soortgelyke parallelle met Jesus se verhaal gevind.

Wanneer ’n mens Jesus en die god Dionysus met mekaar vergelyk, is daar ’n hele paar interessante ooreenkomste. Dionysus se pa die god Zeus, het ’n verhouding aangeknoop met ’n aardse prinses Semele (maagd). Net soos met Jesus word Dionysus se goddelikheid bevestig deur die wonders en tekens wat hy doen. Sowel Jesus as Dionysus word met brood en wyn geassosieer. Dit (brood en wyn) het in die misteriekultusse ’n groot rol gespeel. Dionysus ondergaan ook soos Jesus ’n kruisiging. En wat nog meer interessant is, is dat die Dionysus mite gebaseer is op die godsdiens van Orfisme, wat reeds in die sesde eeu voor Christus bestaan het. In ’n amulet uit die derde eeu n.C. vind ons ’n uitbeelding van ’n man wat hang aan ’n kruis (insiggewend is dat die vroegste uitbeelding van Jesus aan die kruis eers uit die vyfde eeu n. C dateer). Dit lyk presies soos Jesus aan die kruis, eers met ’n nader kyk, sien jy dit is ’n uitbeelding van Dionysus. En volgens tradisie verskyn Dionysus na sy dood aan mense, net soos Jesus na sy kruisiging. In die geval van sowel Jesus as Dionysus kry ons die mite van ’n godheid wat deur mense verwerp is, wat dan weer sal terugkom om die ongelowiges te straf wat hom nie as god wou erken nie.

Die ooreenkomste tussen Jesus en Dionysus wys vir ons baie duidelik dat die Bybelse skrywers (in eerste eeu n.C.) geleen het by reeds bestaande mites. Wie glo ons nou? Net die Jesus verhaal of ook die ander verhale? En op grond van wat kies ons? En hier kies Timothy Freke om te sê dat hy voel dat daar nie ’n Historiese Jesus was nie en dat die rede hoekom ons vandag nog enigsins moet aandag gee aan die allegoriese vertelings van Jesus die Christus, is omdat daar sleutels opgesluit lê vir ons om die waarheid van ons eie Christus bewushein/goddelike essensie te ontdek, en soos self uit die dood (ego) op te staan en ewige lewe (ontdekking van eie onsterflikheid, goddelikheid en Een-wees met God) te ontdek. Hy verduidelik dit dan verder deur dit gelyk te stel met wakker word uit ’n droom...

Die byeenkoms is bygewoon deur meer as 200 mense. En dit op sig self wys dat daar reeds baie belangstelling is in nuut kyk en nuut verstaan...