Nuwe Hervorming Netwerk

Ek het ‘n tyd gelede met iemand gepraat oor godsdienstige sake en agtergekom dat hy ‘n fundamentalis en kreasionis is. Ons het besluit om ons
gesprek later per epos voort te sit en hy het vier vrae aan my gestuur. Hy het deur middel van die tipe vrae wat hy gevra het, probeer om my
“uit te vang”. Nadat ek ongeveer ‘n week gelede die antwoorde aan hom gestuur het, het ek nog geen reaksie van hom af ontvang nie. Miskien is
daar van my ander mede NHN-lede aan wie dieselfde tipe vrae gevra is deur familielede of werkskollegas. Ek deel graag met julle my antwoorde
op die vier vrae:

1. Volgens jou, Hoe bepaal mens reg en verkeerd?

Omdat ek glo in die Goddelike en die moontlike uiteindelike eenwording van die onsterflike deel van lewende wesens met die Goddelike, glo ek
dat enigiets wat hierdie eenwording bespoedig, as goed en reg beskou moet word, terwyl enigiets wat hierdie eenwording teenwerk, as verkeerd
of boos beskou moet word. Iemand wat byvoorbeeld baie selfsugtig en materialisties lewe, se lewenswyse is dus minder “reg” as iemand wat
daarop ingestel is om “nader te beweeg” aan die Goddelike. Daar was deur die eeue heen baie voorbeelde van wyse mense wat die Goddelike beter probeer verstaan het, en wat ander mense probeer help het om hul selfgesentreerde lewenswyses te verander. Sekere maniere van lewe en optree teenoor ander mense, is dus méér reg as ander maniere.

Bybel-fundamentaliste (mense wat glo dat die Bybel die onfeilbare Woord van God is) beweer dikwels dat die Bybel hulle help om te bepaal wat
reg en verkeerd is, en dat die Heilige Gees hulle lei om die Bybel “reg” te interpreteer. Dit is egter interessant dat hulle in Suid-Afrika
soveel uiteenlopende standpunte oor rasseverhoudings gehad het. Die Israelvisie-mense glo byvoorbeeld dat anderskleuriges nie Hemel toe kan
gaan nie, APK-lidmate glo dat afsonderlike ontwikkeling (Apartheid) Bybels-regverdigbaar is, terwyl baie NG-lidmate, baie kreasioniste en
Oom Angus Buchan-ondersteuners glo dat Apartheid onbybels is. Wie is reg en wie is verkeerd? Miskien word geskille oor rasseverhoudings dalk
nie as “belangrik genoeg” geag deur die Helige Gees nie? Miskien was ons pro-Apartheid voorouers doelbewus sondig en ongehoorsaam, omdat
hulle nie die Heilige Gees “reg” wóú verstaan nie?! 
 
2. Volgens jou, wanneer was die laaste boek van die Bybel geskryf? Jaartal?

Ek verstaan nie eintlik waarom die antwoord op hierdie vraag vir jou so belangrik is nie. Ek glo dat die Bybel deur mense geskryf is en dat
dit beslis nié deur ‘n persoonlike God geïnspireer was nie. Ek het die volgende artikel, wat impliseer dat die Nuwe Testament in ongeveer die
jaar 397 n.C. amptelik “gekanoniseer” is, op ‘n Christelike webblad raakgeloop. Jy moet egter onthou dat baie boeke wat as té “gnosties”
beskou is, weggelaat is uit hierdie “amptelike” Nuwe Testament en dat die Sinode van Kartago ‘n sinode van die Rooms-Katolieke Kerk was!

Starting in about 40 AD, and continuing to about 90 AD, the eye-witnesses to the life of Jesus, including Matthew, Mark, Luke, John, Paul,
James, Peter and Jude, wrote the Gospels, letters and books that became the Bible's New Testament. These authors quote from 31 books of the
Old Testament, and widely circulate their material so that by about 150 AD, early Christians were referring to the entire set of writings as
the "New Covenant." During the 200s AD, the original writings were translated from Greek into Latin, Coptic (Egypt) and Syriac (Syria), and
widely disseminated as "inspired scripture" throughout the Roman Empire (and beyond). In 397 AD, in an effort to protect the scriptures from
various heresies and offshoot religious movements, the current 27 books of the New Testament were formally and finally confirmed and
"canonized" in the Synod of Carthage.

http://www.allaboutthejourney.org/history-of-the-bible.htm

3. Wat is die definisie van 'n Christen en wat is die bron van die opinie?

Ek beskou ‘n Christen as iemand wat glo in

(1) Jesus as deel van die Drie-Enige God,
(2) die Bybel as onfeilbare Woord van God, en
(3) dat sekere mense bestem is om die Ewige Lewe te beërwe terwyl andere bestem is vir die Ewige Verdoemenis.

Omdat ek nie in enigeen van hierdie drie geloofsbeginsels glo nie, sien ek myself nie as ‘n Christen nie, maar liewer as ‘n heidense
“gnostikus”. Die meeste Protestante, Rooms-Katolieke en Charismatiese Christene glo in al drie hierdie beginsels. Hulle word deesdae deur
veral ateïste en skeptici as “Christen-fundamentalisties” beskou. Indien iemand egter in slegs een van hierdie drie beginsels nié glo nie,
word hulle deur baie tradisionele Christene beskou as “afvalliges” of “Nuwe Hervormers” in Suid-Afrika, of “liberal Christians” in Amerika.

My definisie van die woord “Christen” is baie soortgelyk aan die volgende definisie van Wikipedia:

A Christian is a person who adheres to Christianity, an Abrahamic, monotheistic religion based on the life and teachings of Jesus of Nazareth,
who Christians believe is the Messiah (the Christ in Greek-derived terminology) prophesied in the Old Testament/Hebrew Bible, and the son of
God. Most Christians believe in the doctrine of the Trinity ("tri-unity"), a description of God as Father, as Son, and as Holy Spirit.

http://en.wikipedia.org/wiki/Christian

4. Kan God of mens net liefde teenoor alles hê? As mens lief is vir kinders moet mens sekerlik aborsie HAAT?

Dit hang natuurlik af van wat mens verstaan met die woord “liefde”. Volgens my is liefde ‘n manier van lewe wat daarop ingestel is om jouself
en ander lewende wesens (insluitende mense en diere) nader aan die Goddelike te probeer bring. Ek strewe daarna om onvoorwaardelik lief te
wees vir alle mense en diere, maar erken dat ek sukkel om dit reg te kry teenoor swart taxibestuurders en superryk mense wat deel is van die
geldmag.

Dit is duidelik dat die God van die tradisionele Christendom beslis nié onvoorwaardelik lief is vir al Sy skepsels nie, omdat Hy na bewering
besluit het om die meeste mense vir ewig hel toe te stuur! Hierdie voorwaardelike liefde verskil van die onvoorwaardelike liefde wat baie ouers
vir hulle (dikwels stout) kinders het.